تفويض... إلى السيد الرئيس
أنا بره الحسبة وتعاقيدها
ووعود الـ100 يوم والنهضة
أنا بره اللعبة ومكايدها
والقوى
موالية
ومناهضة
لا ساحرنى جلالك وشموخك
ولا دُعا مجاذيبك وشيوخك
ولا هعرف أصيرلك درويش
أحمل مبخرة وطاسات خضة
ولا عمرى هسيبك للاتجار
ولا هرمى فى عبك
كور النار
ولا أقلل منك لو تسبق
مش فارقة معايا لا وعودك
ولا مستشارينك
وقروضك
ولا حرب الدولة المدنية
والشرع إزاى راح يتطبق
أنا جايز مابقاش على كيفك
ولا بعرف أزمر يا سموك
وأتفه من أنى أبقى عدوك
أنا ورقة فى جيبك تتطبق
لا حبى ليك هيرقيك
ولا كرهى ليك هيزودنى
أنا عندى صداع هيموتنى
أنا أصلى مانمتش ومطبق