شغل وبيت وعيال وأكل: «كله إلا المواعين»
المرأة العاملة
تبذل المرأة العاملة فى شهر رمضان جهداً مضاعفاً، تتمنّى لو تصبح من ذوى «القدرات الخارقة» لإنجاز المهام المطلوبة منها فى زمن قياسى. عمل ورعاية أطفال وتسوق وتجهيز الإفطار بخلاف الغسيل، وتنظيف الشقة وغسيل المواعين، كل هذه المهام يُصبح إنجازها صعباً فى شهر رمضان لزيادة المسئوليات وضيق الوقت، وهو ما دفع عدداً من الشيفات عبر برامج الطهى المختلفة إلى عمل أكلات معينة خاصة بالسيدات العاملات، لا تتطلب وقتاً طويلاً، وفى الوقت نفسه تتكون من عناصر غذائية مفيدة لها وللأطفال.
معاناة المرأة العاملة فى رمضان
«باجى من الشغل على البيت جرى، كأنى داخلة مسابقة، بابقى عايزة أخلص الأكل على الفطار، عيالى وجوزى مالهمش ذنب يستنوا جنبى».. معاناة آمال حسن، 53 عاماً، التى تعترف بأن شهر رمضان أصعب شهور السنة على أى أم، خصوصاً لو كانت عاملة: «أكل أول رمضان بيكون محمر ومشمر، لأنى باجهز فيه من قبل رمضان بأسبوع.. لكن بنيجى على نص رمضان كده ونبدأ فى البانيه والبفتيك والكفتة مع المكرونات، كل واحدة بتدور على الحاجات السهلة اللى ماتاخدش وقت»، فيما تخصص يومين أو 3 على الأكثر للعزومات، نظراً لضيق الوقت.
«باخلص الشغل، أجرى علشان أحضّر الفطار، وبعد ما أفطر أدخل على المواعين، وبعد الصلاة أبدأ فى تحضير السحور، وبعد السحور أبدأ فى تجهيز أكل اليوم التانى علشان الصبح بابقى فى الشغل.. دوامة ما يعلم بيها إلا ربنا»، حسب هناء سعد، معلمة، التى تعد وجبات فطار خفيفة، نظراً لضيق الوقت: «بيبقى عندى كنترول وتصحيح، ووقتى بيضيع دايماً، فباجهز من بالليل، ولو تعبانة قوى بناكل كبدة وبطاطس وبانيه ونقلى أى حاجة من الفريزر.. وكده كده مش بيبقى عندى غير عزومتين طول الشهر».
من جانبها قدمت الشيف مها نور، بعض الوجبات الصحية البسيطة التى تساعد السيدات العاملات فى إنقاذ أوقاتهن، باستخدام بعض بواقى الطعام، ومن ذلك كوردن بلو المكرونة، الذى لا يحتاج سوى ساعة للتجهيز: «نص كيس مكرونة، باقى قطع الفراخ، لانشون، جبنة شيدر، مشروم، مكعب مرقة دجاج، 4 أكواب لبن، 5 ملاعق دقيق، وعيش فينو، وزيت، وزعتر»، والطريقة وفقاً لـ«مها» هى وضع البشاميل فى الصينية، ثم نصف المكرونة، وفوقها الدجاج، ثم نفرد اللانشون، وفوقه شرائح الشيدر، ومن ثم وضع باقى المكرونة والمشروم، والبشاميل فوقها، وبعد طحن الفينو مع الزعتر والزيت يتم وضعه على الوش وإدخال الصينية الفرن.
ومن الوصفات التى تحتاج إلى ساعة ونصف الساعة فقط لإعدادها فتة حمص الشام: «نص حمص مسلوق، نص لبن رايب، ربع كوب طحينة، 4 فصوص توم، نص ليمونة، معلقة صغيرة كمون، ملح، نسلق الحمص، ونضع الطحينة والثوم والليمون فى الخلاط، ثم نضع نصف الحمص، مع الماء وإضافة اللبن، وتحمير الخبز وتقطيعه فى أرض الصينية، ونصب الخليط ونزين بالبقدونس والطماطم، مع بعض الحمص».