فى ذكرى عزل «مرسى»: الأهالى للإخوان: «كل عزل وانت طيب»
فى كل مناسبة يتكرر المشهد؛ وقفات.. مسيرات.. وبانرات تهنئة من الرئيس المعزول محمد مرسى فى الأعياد القومية، يرفعها أنصاره، ويردد هتافاتها أبناء «عشيرته». عادت من جديد فى شوارع المعادى تزامناً مع اقتراب 30 يونيو، ذكرى القضاء على إرهاب الإخوان، ببانر يحمل صورة «مرسى» مهنئاً المصريين بحلول شهر رمضان، لم يتركها الأهالى تمر فى سلام ولكن قرروا أن يكون رد التهنئة بتهنئة أقوى: «كل عزل وانت طيب». سليمان محمد، أحد سكان شارع 77 بمنطقة المعادى، أكد أنه اعتاد على خروج أنصار الإخوان بالمنطقة فى كل مناسبة، وانتشار بوسترات التهانى فى الشوارع، لكنه يتعجب فى تلك المناسبة لتزامنها مع ذكرى عزلهم: «راشقين فى كل حاجة، حتى اليوم اللى اتعزل فيه رئيسهم خارجين يدعوا فيه بالنزول ويهنونا على رمضان، هما فى إيه ولا إيه؟ دول المفروض يقعدوا فى بيوتهم يندبوا على خيبتهم وإن إرهابهم وحقدهم اتكشف للناس كلها، وفاكرين إن الـ20 اللى بيقفوا فى الشارع منهم آلاف وملايين ويرجعوا يقولوا مسيراتنا مكسرة الشوارع»، لم يهتم الرجل الأربعينى ببانرات التهنئة بشهر رمضان التى حملها أنصار الجماعة فى وقفتهم، لكنه يغضب كلما يراها ملصقة على جدران شوارع منطقته: «مايهمنيش وقفاتهم ولا اللى بيطلعوا بيه ويمسكوه، بس كل اللى ضايقنى إنهم فضلوا يلزقوا الحيطان ببوسترات زى البانر اللى ماسكينه عليه صورة مرسى وبيهنينا على رمضان ومصدقين نفسهم إنه لسه الرئيس. «الرئيس محمد مرسى يهنئ المصريين والأمة الإسلامية بحلول شهر رمضان المبارك»، الجملة التى توسطت البانرات التى نزل بها أنصار الإخوان بشوارع المعادى، والتى تعامل معها «سليمان» والأهالى بسخرية شديدة: «هما خرجوا بعد صلاة التراويح فى الشارع من المساجد ماسكين البانر وداروا بيه فى الشوارع، لكن مفيش حد اهتم بوقفتهم ولا صوتهم اللى فضل يدعى بالنزول يوم 30 يونيو، والكل بقى يعدى من قدامهم يضحك عليهم ويمشى وهما مفروسين وتانى يوم نزلنا دهنا الحيطان مكان اللى كتبوه وشيلنا البوسترات اللى علقوها».