صُناع عربات الـ"تيك أواي": مشاريع الشباب مكسبنا.. والسعر حسب الخامة
صاحب إحدى العربات يتحدث لـ«الوطن»
المكان «شارع أمير الجيوش» فى قلب القاهرة الفاطمية وهو أشهر مكان لصناعة عربات ومعدات الطعام، داخله تتراص عربات ملونة تعلوها تاندة بـ4 عجلات من الكاوتش، أمام مجموعة من المحلات، تجذب انتباه المارة، ويختلط المشهد بضجيج «الدق» الناتج عن طرق الألومنيوم والصاج داخل الورش الموجودة فى الشارع، الذى شهد نشاطاً ملحوظاً منذ إطلاق مشروعى «شارع 306، وشارع مصر»، وتسارع الشباب المشاركون فى المشروعين إلى هناك لشراء العربات الخاصة بمحلاتهم.
أمام محل صغير، جلس تامر سيد، 39 عاماً، جديد فى المهنة مقارنة بمن حوله من المحال التى اعتادت على صناعة عربات الأكل منذ سنوات طوال، لأنه اقتحم هذا المجال منذ 5 أعوام، بعد أن ترك عمله مع أحد أصدقائه فى مشروع خاص».
"تامر": ابتكرت تصميماً جديداً لجذب الزبائن
ولكى يكون متميزاً عن غيره يقوم «تامر» بعمل تصميمات مختلفة لعربات «التيك أواى» عن الأشكال المتداولة داخل ورش الشارع، مضيفاً: «بازور كل الورش عشان أشوف العربيات المعروضة عندهم، وأبدأ أفكر فى تصميمات مختلفة، وأرسمها على الورق بشكل كروكى، وأبعتها الورش تتصنع وتيجى لى جاهزة، وسعر عربة الفيشار يبدأ من 2000 جنيه، وعربة الكريب 7000 جنيه».
الأدوات المستخدمة فى صناعة عربات «التيك أواى»، تتمثل فى الصاج والكروم والألوان المستخدمة فى الدهان، بجانب الحديد والكاوتش، وواصل «تامر»، حديثه قائلاً: «العربية بيدخل فيها حاجات كتير وبتكلف المصنع، وسعرها يعتبر مناسب جداً وفى متناول الشباب»، ومشروع «شارع 306»، أسهم فى زيادة إقبال الشباب على الشارع للحصول على عربات «التيك أواى، لأن فيه 5 شباب جم اشتروا من عندى عربيات سندوتشات وزلابية وفيشار، وشحنتهم لهم على شارع 306 اللى فى مساكن شيراتون، وبتمنى إن التجربة تتعمم على جميع المناطق، لأنها هتوفر فرص عمل للشباب، وهتنشط حركة الصناعة والبيع».
بين عدد كبير من معدات المطاعم والفنادق، المصنوعة من الاستانلس الخالص داخل محله، وقف طه حمدى، 65 عاماً، الذى قضى حياته فى هذه المهنة، وقال: «أخويا كان من أوائل الناس اللى اشتغلت فى عربيات الأكل ومعدات المطاعم والفنادق، واتعلمت الشغلانة على إيديه بنصنع الشغل فى ورشة جنب المحل». وتابع: «4000 جنيه سعر متر الاستانلس وبنتعامل هنا بالمتر، يعنى تكلفة الشغل بتتحدد على أساس عدد الأمتار اللى استهلكتها فى التصنيع، وسعر عربية التيك أواى المصنوعة من الاستانلس 8500 جنيه، وشواية الشاورمة بـ10000 جنيه، أما سعر الفرن الاستانلس فيبدأ من 4000 جنيه حتى 20 ألف جنيه، والشغل الاستانلس غالى، لكن ليه زبونه اللى بيدور على حاجة تعيش معاه، والطلب زيادة على عربيات الكبدة وعربيات الفول، وأسعارها بتبدأ من 2000 جنيه، ومدة تسليم الشغل تتراوح ما بين أسبوع حتى شهر كحد أقصى، ويتحدد ذلك حسب حجم الطلبية والمحل فيه 2 صنايعية معايا عشان يحمّلوا الشغل على العربيات، لكن الورشة فيها أكتر من 10 صنايعية»، وأنهى «طه» حديثه، بالقول: «الشوارع إللى عمالة تتفتح للشباب ساعدت فى زيادة الإقبال على عربيات الأكل هنا، خصوصاً عربيات الكبدة، وحمص الشام».
"نعيم": الطلب فى تزايد
أمام محل صغير به عدد كبير من الأوعية الألومنيوم المخصصة لحمص الشام والفول، وقف أمير نعيم، شاب فى منتصف الثلاثينات، صاحب المحل وتوارث المهنة أباً عن جد، تحدث قائلاً: «شغال هنا فى كل حاجة، عربيات الكبدة والفول وطاحنات الطعمية والفيشار والكشرى وشوايات السمك وعربيات حمص الشام، كل حاجة يحتاجها الزبون عندنا».